दीक्षाभूमीच्या व्यवस्थापनावरून राजू पटेल यांची चिंता; पारदर्शकतेची मागणी

दीक्षाभूमीच्या व्यवस्थापनावरून राजू पटेल यांची चिंता; पारदर्शकतेची मागणी यवतमाळ / नागपूर, दि. १७ ऑक्टोबर २०२६ नागपूर येथील पवित्र दीक्षाभूमीच्या व्यवस्थापनावरून निर्माण झालेला वाद आणि दीक्षाभूमी राष्ट्रीय स्वयंसेवक संघाच्या (RSS) ताब्यात जाण्याची व्यक्त केली जाणारी भीती, ही बाब अत्यंत गंभीर असल्याची चिंता जनहित लोकशाही पार्टीचे प्रदेश उपाध्यक्ष श्री. राजू पटेल (यवतमाळ) यांनी व्यक्त केली आहे. प्रसिद्ध झालेल्या वृत्तानुसार, स्मारक समितीचे सचिव डॉ. राजेंद्र गवई यांनी वंचित बहुजन आघाडीचे नेते ॲड. प्रकाश आंबेडकर यांच्या भूमिकेला पाठिंबा दिला आहे. भदंत आर्य नागार्जुन सुरई ससाई यांच्या कार्यपद्धतीबाबत तसेच दीक्षाभूमीतील विविध खोल्यांना कुलूप लावणे आणि कर्मचाऱ्यांना धमकावणे यासंबंधी आरोप करण्यात आले आहेत. राजू पटेल म्हणाले, “दीक्षाभूमी हा केवळ स्मारक नाही, तर तो आमच्या अस्मितेचा, डॉ. बाबासाहेब आंबेडकरांच्या विचारांचा आणि लाखो भीम अनुयायांच्या श्रद्धेचा केंद्रबिंदू आहे. तिथे हुकूमशाही चालणार नाही. जर व्यवस्थापनात पारदर्शकता आली नाही, तर हा वाद आणखी चिघळेल.” ते पुढे म्हणाले, “डॉ. राजेंद्र गवई आणि ॲड. प्रकाश आंबेडकर यांनी व्यक्त केलेली भीती संपूर्ण आंबेडकरी समाजासाठी चिंतेचा विषय आहे. माजी मंत्री डॉ. नितीन राऊत यांनी चर्चेचा जो पुढाकार घेतला आहे, त्याचे आम्ही स्वागत करतो. भदंत सुरई ससाई यांनी स्वतः पत्रकारांसमोर येऊन आपली भूमिका मांडावी, कार्यकर्त्यांना पुढे करू नये, अशी आमची मागणी आहे.” “दीक्षाभूमी कोणत्याही एका व्यक्तीची जहागीर नाही. ती समाजाची आहे. समाजाने आता पुढाकार घेणे गरजेचे आहे, अन्यथा इतिहास आपल्याला माफ करणार नाही,” असेही राजू पटेल यांनी स्पष्ट केले. जनहित लोकशाही पार्टी या संपूर्ण प्रकरणावर लक्ष ठेवून आहे. गरज पडल्यास नागपूर येथे सर्वपक्षीय बैठक घेऊन आंदोलन करण्यात येईल, असा इशाराही श्री. राजू पटेल यांनी दिला आहे. जय भीम! जय संविधान! श्री. राजू पटेल मलनस प्रदेश उपाध्यक्ष, जनहित लोकशाही पार्टी यवतमाळ, महाराष्ट्र संपर्क क्रमांक: 9075801000